Ena Murray Oordenkings. Ena MurrayЧитать онлайн книгу.
asseblief hierdie gebed. O, dit gryp jou só aan dat dit jou ook op jou knieë móét dwing. Hoor dan hoe pleit Hy: Ek bid vir hulle. Ek bid nie vir die wêreld nie maar vir dié wat U My gegee het, omdat hulle aan U behoort … Ek bly nie langer in die wêreld nie, maar hulle bly nog in die wêreld … Heilige Vader, bewaar hulle in u Naam … Ek bid nie dat U hulle uit die wêreld moet wegneem nie, maar dat U hulle van die Bose moet bewaar … sodat die liefde wat U aan My bewys het, in hulle kan wees en Ek ook in hulle.
O Jesus! Jesus, van Getsemane en Golgota, dat U aan mý kon dink, vir mý kon bid toe die skaduwee van die kruis reeds oor U gehang het. Dankie, Here! Dankie! Amen.
21 Maart
… maar julle het ’n Vader wat weet dat julle dit nodig het. – Lukas 12:30
Veronderstel jy is in sulke geldelike moeilikheid dat jy verplig is om by die bank te gaan aanklop om hulp. Jy is bekommerd. Sal die bankbestuurder jou help? Sê nou maar hy weier … hoe gaan jy dan uit hierdie verknorsing kom? Op pad bank toe loop jy ’n paar vriende raak en jy vertel hulle waarheen jy op pad is en om watter rede. Almal troos jou en praat jou moed in: “Maar natuurlik sal die bankbestuurder jou help!” Maar die twyfel bly in jou hart, én die kommer, tot daardie oomblik dat die bankbestuurder vir jou sê: “Goed. Ek help u graag.” Dán eers weet jy bo alle twyfel jy is gered.
Die belofte in ons teksvers vir vandag kom nie uit die mond van ’n profeet, ’n predikant of jou vriend terwyl jy in jou bankrotskap op pad bank toe is nie. Hierdie woorde word deur niemand anders nie as Jesus Christus self geuiter. Dis Jesus, Seun van ons Hemelse Vader, wat vandag vir jou sê, jy met die groot kommer in die hart, jy met die baie kwellinge, jy wat dink God sit in sy hemel daar vér, verhewe bo die mees alledaagse behoeftes van die mens op aarde: Jy het ’n Vader wat wéét wat jy nodig het. Jy het ’n Vader wat gretig is om vir jou méér te gee as wat jy ooit bereid is om te vra.
Die teks wat volg op ons teks vir vandag, lui: Beywer julle vir sy koninkryk, dan sal Hy julle ook hierdie dinge gee. Kom ons maak vir ons minder sorge oor ons tydelike behoeftes. Kom ons werk vir die koninkryk – dán, dit het Hy belowe, sal Hy ook wat die tydelike betref, vir ons voorsien.
Dankie, Here, dat ek kan weet U ken my omstandighede. U weet wat my behoeftes is. Help my dan om al my bekommernisse op U te werp – en dan met ywer te werk vir u koninkryk. Amen.
22 Maart
“‘As U iets kan doen’ sê jy,” antwoord Jesus. “Vir die een wat glo, kan alles.” – Markus 9:23
Daardie woordjie “as”!
Dit is ’n gifnaald vir menige se geloof. Dit is die verlammingsinspuiting vir baie van ons, wat dit vir ons onmoontlik maak om ’n lewende getuie vir God te wees. “As” is baie dikwels ’n soliede staalhek wat ons afsonder van God se almag en dit vir ons onmoontlik maak om God se volle genade deelagtig te word.
In hierdie gedeelte word ’n seun wat aan stuiptrekkings ly, na Jesus gebring. Trouens, dis Jesus self wat gesê het hulle moet die kind na Hom toe bring toe Hy hoor van sy lyding.
Maar hoor nou net wat sê die pa van die kind – en dit klink nogal baie nederig en verleë ook: “As U tog miskien iets daaraan kan doen, kry ons jammer en help ons.” En Jesus antwoord hom: “‘As U iets kan doen,’ sê jy!”
Doen ons dit nie ook nie? Gaan ons nie dikwels na Jesus met ons probleme en kommer met daardie woordjie “as” vooraan nie?
Jesus het ons genooi om ons bekommernisse en sondes op Hom te werp, soos Hy die seun se pa genooi het om die kind na Hom te bring om gesond gemaak te word. En dan wanneer ons by Hom kom, kom ons met daardie beledigende, daardie verderflike “as” vooraan ons smeekgebede. Ons lê ons kwellinge en sondes voor sy voete neer, maar met die gesindheid van “as Hy miskien iets daaraan kan doen” in die hart.
Jesus sê vandag vir jou: “Vir die een wat glo, kan alles.” En wanneer Hy sê alles, beteken dit álles.
Here, dis my eie ongeloof en kleingelowigheid wat maak dat ek nie in die volle vreugde van u goedheid kan deel nie. Neem dit van my weg, Here! Amen.
23 Maart
“Die een wat ek soen, dit is Hy. Gryp hom!” – Matteus 26:48
Elke keer wanneer ’n mens hierdie woorde lees, skok dit jou opnuut. Om met ’n soen, die teken van liefde, getrouheid en toewyding, die hoogste verraad denkbaar te pleeg! ’n Mens kan nie anders as om die grootste veroordeling en afkeer daaroor uit te spreek nie.
En tog … ons doen dit ook. Ons doen dit dikwels.
Ons doen dit teenoor ons lewensmaat, teenoor ons medemens, ook teenoor God. Ons soen hulle dikwels met verraad in die hart.
Ons gee voor ons is ten volle betroubaar, ons is ’n vriend op wie ons vriende kan staatmaak. Maar hoe dikwels gebeur dit dat ons soos ’n Judas ons beste vriend verruil vir ’n ander wat ons op daardie oomblik meer kan bied? Hoe dikwels loop ons pad allesbehalwe eerlik en reguit met dié mense wat ons vertrou en op ons reken?
Ons doen dit met ons lewensmaat. Ons doen dinge agter sy of haar rug. Ek het ook gevind dat daar teenoor niemand op aarde meer leuens vertel word nie as juis teenoor die lewensmaat. Dit het al by party getroudes ’n gewoonte geword, só dat hulle nie meer dink dis verkeerd nie. Hulle kom nie eens meer agter hoe hulle mekaar belieg nie. En daardie soen waarmee ek vanaand my man groet wanneer hy van sy dagtaak af tuiskom – terwyl ’n ander man se spore nog vars by die agterdeur uit lê … Daardie soen wat ek my vrou gee wanneer ek op pad is na ’n “vergadering”, of na die “sportveld”, terwyl my spore in glad ’n ander rigting gaan loop … na vreemde geselskap … Daardie ligte flirtasie waarin ek lankal nie meer enige kwaad sien nie …
Ons doen al hierdie dinge en dan soen ons Jesus en sê vir Hom: Ek is u kind?
O, God, wees ons arme sondaars genadig! Amen.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.