Ena Murray Oordenkings. Ena MurrayЧитать онлайн книгу.
wees! En dóén dit dan – vandág nog!
Here, help my om op te hou met kla en om te doen. Amen.
30 Januarie
… Waar is die ander nege dan? – Lukas 17:17
Dankie.
Een van die kortste woordjies in enige taal. Een wat so maklik is om uit te spreek. Die een woord wat die minste gebruik word wanneer dit juis gebruik móét word – in enige taal.
Jesus het tien melaatses gesond gemaak. Net één het teruggekom om dankie te sê. Dis hartseerwekkend om Hom te moet hoor vra: Waar is die ander nege dan?
Hoe skuldig staan ons! Hoe vele kere word ons onder daardie nege getel? Hoe baie dankies in my en jou lewe lê ongesê en wag om ééndag geuiter te word … ’n ééndag wat dalk nooit sal aanbreek nie.
Dis ook nie dat ons nie dankbaar is nie. Vir geen oomblik kan ’n mens glo dat die ander nege melaatses nie ook bly en dankbaar was dat hulle genees is nie. Nee. Maar hulle het vergeet of nagelaat om terug te kom en dit te sê!
Moenie jou “dankies” laat wag nie. Jy weet nie of jy vorentoe kans sal kry om dit te sê nie. Sê dit liewer vandag. Sê dit nóú:
Dankie, my man, dat jy vir my so ’n goeie lewensmaat is. Dankie dat jy so ’n vader vir ons kinders is. Dankie, my kind, dat jy so ’n goeie kind vir my is. Dankie, Ma, Pa, dat julle sulke liewe ouers vir my is. Dankie, my vriend, vriendin, vir jou vriendskap. Dankie, Meneer, dat u so ’n goeie werkgewer vir my is. Dankie, Mevrou, dat jy nog altyd so ’n betroubare werknemer was. Dankie! Dankie! Dankie!
Sê dit nóú!
Dankie, my God en Vader, vir wat U vir my oor die span van jare was en is. Amen.
31 Januarie
Wie medelye met ’n vriend beskou as ’n las, het die eerbied vir die Almagtige verwerp. – Job 6:14
Vriendskap – een van die mooiste dinge wat God aan die mens gegee het. Salomo het vriendskap só hoog geag dat hy in Spreuke 18 vers 24 sê: “Daar kan ook ’n vriend wees wat nader is as ’n broer.”
Op grond waarvan kies jy jou vriende?
Is dit die aansien en status wat jý sal bekom as jy hulle jou vriende kan noem? Is dit die gedagte aan wat jy uit hulle kan haal deur met hulle bevriend te wees? Is dit omdat jy reken jy kan deur hulle ook in die kalklig kom?
Daar word gesê jy word aan jou vriende geken. Maar daar is vriendskappe wat ’n mens stomslaan. Daar is die kind van God wat so dik bevriend is met die man wat God oop en bloot in woord en daad in sy lewe ontken, dat ’n mens moet wonder: Een van die twee is vals. Is dit sy vriendskap of sy belydenis?
En watter soort vriend is jý? Die mooiweersvriend wat net vriend is solank dit goed gaan, maar sodra jou medemens op jou moet steun, op jou wil reken om die kern waarom dit in vriendskap gaan, uit te lewe, dan faal jy? Is jy die soort mens wat dit as ’n las beskou wanneer vriendskap medelye van jou vra?
’n Goeie vriend is nie ’n blinde vriend nie. Pasop vir die vriend wat in alles met jou saamgaan, wat jou net altyd vlei. ’n Vriend wat jou nie met deernis en liefde – ja, dit natuurlik! – keer wanneer jy verkeerd gaan nie, is nie ’n vriend nie. ’n Vriend in wie jy nie die volle vertroue kan stel om jou ook wanneer jy fouteer, met verdraagsaamheid en opregtheid daarop te wys nie, is geen vriend nie.
Here, maak my ’n ware vriend vir my vriende. Amen.
Roosknop vir ’n engel
Hy het gesê daar is baie huise daar Bo –
nie vir almal … net vir hulle wat glo.
Ek bid vir ’n huisie ook vir my,
asseblief, Here, met ’n tuintjie daarby;
want ek is so lief vir my tuin hier onder,
só lief vir die bome en blomme, en wonder
maar net of ek eendag hierna weer sal buk
om soms vir ’n engel ook ’n roosknop te pluk.
1 Februarie
… en die Engel van die Here sê vir haar: “Gaan terug na jou eienares toe en onderwerp jou aan haar gesag.” … Hagar het toe die Naam van die Here wat daar met haar gepraat het, aangeroep en gesê: “U is ’n God wat my sien …” – Genesis 16:9, 13
Dis nie maklik om onregverdige behandeling te moet verduur nie. Onderwerping aan ’n onredelike, onregverdige mens kom nie vanself nie. Die menslike natuur is so dat jy dadelik in opstand daarteen kom.
Ook vir Hagar was dit onmoontlik om langer Sarai se slavin te bly, want Sarai het haar sleg behandel – nie omdat Hagar ’n slegte slavin was nie, maar juis omdat sy haar meesteres se wense gehoorsaam het deur ’n surrogaatmoeder vir Abram se kind te wees aangesien Sarai self nie swanger kon raak nie. En dis nou die dank wat sy daarvoor kry!
Is dit nie bekende woorde nie? Het jy dit nog nooit in jou lewe gebruik nie? Dis nou die dank wat ek daarvoor kry!
Hagar het besluit om weg te loop. Maar God ontmoet haar op haar pad en sê vir haar: “Gaan terug en onderwerp jou!”
As daar iets met jou gebeur wat jou laat voel jy wil jou goed vat en loop, onthou dan: God het ’n doel met alles. Net soos Hagar moet jy ook tot die besef kom: Hy is ’n God wat my sien. En dié besef is vir jou genoeg. God weet van die onreg, van die slegte behandeling, van die onbillikheid en onreg wat teenoor jou gepleeg word. En Gód sal dit regstel. Gód sal dit vergeld. Gód sal jou beloon. Hou net moed en vertrou Hom.
Hoe wonderlik om te weet, Here, U sien alles. U weet van alles. Hoe moeilik my omstandighede ook al is, laat my net altyd u wil soek en doen. Amen.
2 Februarie
Uit eerbied vir julle God mag julle mekaar nie uitbuit nie. Ek is die Here julle God. – Levitikus 25:17
Ons is almal gretig om ’n winskopie te maak. Veral in vandag se duur tye is ons bedag daarop om iets raak te loop wat ons beursie ten goede sal kom.
Op sigself is daar niks mee verkeerd nie. As die winkel sy pryse afmerk, is dit sekerlik nie verkeerd om van dié geleentheid gebruik te maak en so ’n paar sente te spaar nie.
Maar dan is daar die ander soort winskopie …
Iemand het geld dringend nodig. Hy moet iets verkoop, iets waarvan hy onder normale omstandighede nooit sou afgesien het nie. Maar hy is die verleë persoon, en dis maar te waar dat die man wat verleë is, nie die man is wat die prys maak nie. Jy wéét van dié man se omstandighede, en jy weet hy is in ’n verleentheid. Nou kan jy jou slag slaan. Nou kan jy ’n winskopie duisend bekom – en dit teen jóú prys. En dan spog jy nog daarmee. Jy het dit of dat teen die belaglike prys van soveel in die hande gekry, want sien, die ander ou was in die knyp. Hy móés eenvoudig verkoop. Die een se dood, so sê die spreekwoord mos, is die ander se brood.
Is dit nie hoe ons soms sake doen nie? En glo ons werklik dat God dit ook goedkeurend as ’n winskopie beskou?
Hy waarsku hierteen. En Hy noem dit by ’n ander naam: uitbuiting. Hy sê ook: Uit eerbied vir julle God, dié God wie se Naam julle bely, mag julle nie ’n ander se haglike omstandighede uitbuit nie. Want God weet van hierdie transaksie.
Ag, Here, bewaar my daarvan dat ek my naaste se moeilike omstandighede sal uitbuit omdat ek nie die nodige eerbied vir U het nie. Amen.
3 Februarie
“Verweer jy jou glad nie?” het hy gevra. “Kyk waarvan beskuldig hulle jou alles.” Jesus het egter niks meer gesê nie, sodat Pilatus verbaas was. – Markus 15:4, 5
Daar kom tye wanneer ’n mens moet praat. Daar kom ook tye dat jy moet swyg.
Ons