Suster Lilian se swangerskap & geboorteboek. Lilian ParamorЧитать онлайн книгу.
’N BEHOEFTE AAN BEHEER
Wilskrag en doelgerigtheid is jou dryfkragte. Dit oortuig jou en andere soms dat niks jou kan onderkry nie en dat jy enige uitdaging die hoof kan bied. Jou stamina is gemiddeld, net soos jou liggaamsbou en -struktuur. Die wonderlikste van jou is dat jy weet hoe om vir uitdagings voor te berei en dat jy baie dapper is. Jy sal jou nie in swangerskap, kraam, geboorte en ouerskap begeef sonder behoorlike nadenke en ’n paar planne in jou mou nie. Jou behoefte aan beheer kan tot jou voordeel wees, maar ook tot jou nadeel. Swangerskap, kraam en moederskap vereis dat jy jou in ’n mate eenvoudig aan die proses moet oorgee en van oomblik tot oomblik moet aanpas om die meeste voordeel te put uit die geleenthede wat hulle voordoen. Jy sal dit moontlik moet leer doen. ’n Kraamomgewing waaroor jy meer beheer het, kan jou ervaring en gevolglik jou persepsie van hoe pynlik die proses was, grootliks verbeter.
Eienskappe
Ander karaktertrekke: vasbeslote, doeltreffend, ambisieus, presies, ordelik, krities, kwaai, koppig, ondernemend, intens, analities, sarkasties, goeie leier, duld nie dwaasheid nie.
Liggaamlike eienskappe: middelmatige beenstruktuur, geneig om vroeg grys of bles te word, sweet baie, loop met vasbeslote treë, matige krag en uithouvermoë, intense oë, gepunte rooi tong.
Eetpatroon en lewenstyl: maaltye moet betyds wees, geneig tot intense honger, groot eetlus, verkies koel kossoorte en drankies, hou nie van sterk gegeurde kos nie (hoewel jy ’n drang daarna kan hê), lief vir mededingende sport, altyd stiptelik.
Siektepatroon: spanning as gevolg van volgehoue harde werk, sooibrand, slegte spysvertering, aknee, veluitslag, halitose, maagsere, aambeie, warm gloede, ontsteekte rooi gewrigte.
Wenke vir voorbereiding op swangerskap
•Verslap die pas van jou intense aktiwiteit voor en gedurende swangerskap, word byna wat jy as ondoeltreffend sou afmaak. Jy sal ontdek dat die lewe ook ander fasette het, dat ontspanning heilsaam kan wees en dat jy besig is om ’n baie belangrike taak te verrig – om jou baba te laat groei!
•Bederf jouself met ’n weeklikse aromaterapie- of refleksologiesessie by ’n ervare terapeut. Dit sal jou help om te leer ontspan en te sit en “niksdoen” terwyl iemand anders iets vir jou doen. Jy sal ook agterkom dat beheer nie al is wat tel nie.
•Volg ’n gereelde, matig inspannende oefenprogram. Goeie oefening sluit swem, stap, strekoefeninge en joga in. Vermy mededingende sport, wat bykomende eise aan jou energie en jou liggaam se aangebore reguleringstelsel stel.
•Geniet so dikwels moontlik die kalmerende uitwerking van die natuur.
•’n Fonteintjie kan ook baie kalmerend wees vir intense vroue soos jy.
GROEP 3: ONTSPANNE, MAAR GENEIG TOT OORGERUSTHEID
As daar een groep vroue is wat ’n mens beny vir hul skynbaar natuurlike talent vir die lewe, swangerskap, kraam en moederskap, is dit dié een. Hulle is dikwels die Aardmoedertipe, maar dit is nie altyd met die eerste oogopslag duidelik nie. Hulle is wel ooglopend volkome ontspanne. Hulle is wonderlike vriende, aangesien hulle selde krities is en baie verdraagsaam is teenoor ander. As jy in hierdie groep tuishoort, het jy die bou van ’n atleet: sterk, met ’n groot beenstruktuur. Een van jou swakhede is jou voorliefde vir soetgoed, en jy mag dalk effens meer weeg as wat ideaal is. Jy is geseënd met ’n hoë pyndrempel en jy sweef deur die lewe.
Eienskappe
Ander karaktertrekke: vermoë om te ontspan, oorgerustheid, lojaliteit, jaloesie, normaalweg rustig, vriendelik, uitstekende geheue, onverstoorbaar, lieftallig, vergewensgesind, stadig en metodies, elegant, word stadig kwaad, kalmte.
Liggaamlike eienskappe: sterk liggaamsbou, tel maklik gewig op, stap ritmies, gladde glimmende vel, dik hare, groot blink oë, goeie uithouvermoë en stamina, hou nie van klamheid en koue nie, dik en groot tong.
Eetpatroon en lewenstyl: slaan maklik maaltye oor, trae spysvertering, stadige eter, emosionele eter, trae opstaner, slaap diep, hou van sport wat uithouvermoë verg, dikwels laat vir afsprake.
Siektepatroon: diabetes, allergieë, vetsug, depressie, mukuskongestie, sinus, brongitis, nat hoes, hoë cholesterol, los pynlike gewrigte.
Wenke om vir swangerskap voor te berei
•Oefen gereeld om jou natuurlike uithouvermoë ten beste te benut. Stap, draf, akwa-aërobiese oefeninge in die eerste twee trimesters en dans is goed vir jou. Jy kan tot ’n taamlik inspannende vlak opbou. Dit sal voorkom dat jy te ontspanne is en sorg dat jy in ’n uitstekende fisieke toestand is vir die geboorte.
•Pas tydbestuursvaardighede toe om jou te help in die bedrywige dae wat voorlê, maar moenie jou vermoë om sake in perspektief te sien, verloor nie.
•Skenk nou reeds spesiale aandag aan die algemene voedings- en ander spesifieke wenke (sien Voeding vir ’n gesonde swangerskap en baba).
•As jy oorgewig is, moet jy sorg dat jy die meeste oortollige kilogramme afskud voordat jy swanger raak om die swangerskap ’n gemakliker ervaring te help maak.
•As jy of jou nabye familie las het van allergieë, is dit raadsaam om reeds voordat jy swanger raak die ses algemeenste dieet-allergene – koring, koeimelk, soja, vis, eiers en grondboontjies – te vermy, asook enige ander waarvoor jy of jou maat spesifiek allergies is.
•Al is jy so lief om laat te slaap, moet jy teen 06h00 wakker word om te sorg dat jou stelsel gebalanseerd bly en jou liggaam se aangebore regulerende stelsels optimaal funksioneer.
•Reis is vir jou soos terapie en dit hou jou jonk en gelukkig. Reis gereeld!
•Pak ’n nuwe stokperdjie aan om jou energiek en op en wakker te hou.
•Stel jou horlosie ’n paar minute vroeg vir beter tydsbestuur.
ALKOHOL, DWELMS EN ROOK
Deur die jare het baie vroue al teenoor my hul kommer gelug oor die uitwerking van hierdie gewoontes op hul pas verwekte babas. Teen die tyd dat jou swangerskap bevestig word, het vier tot agt uiters belangrike weke van die baba se ontwikkeling reeds verloop. Hierdie gewoontes kan potensieel verwoesting aanrig in daardie tyd.
Alkohol en dwelms
Die enigste bekende veilige perk vir alkohol en ander dwelms gedurende swangerskap is nul. Jou liggaam se reaksie op alkohol hang van jou individuele samestelling af. Volgens beskikbare navorsing sal ’n glasie wyn af en toe waarskynlik nie skade aanrig nie. Vergryping, selfs net by uitsondering, kan egter net so nadelig wees vir Baba as ’n gereelde strawwe drinkery. Spiritualieë moet vermy word. Strawwe alkoholinname gedurende swangerskap hou verband met ’n hele sindroom van probleme, waaronder gebrekkige breinontwikkeling. Al is uiters matige gebruik nie juis rede tot kommer nie, kom spyt altyd te laat. Indien daar ’n neiging tot alkohol- of ’n ander afhanklikheidsprobleem by enigeen van die twee families is, moet jy dit liefs heeltemal vermy om afhanklikheid by die ontwikkelende baba te voorkom.
Baie vroue is bekommerd omdat hulle alkohol gebruik het voor hulle geweet het hulle is swanger. Vermy dit verkieslik heeltemal of beperk jou inname grootliks as jy swangerskap beplan, ingeval bevrugting plaasvind, maar soms gebeur die onvoorsiene. Ek kan nie ’n absolute versekering kan gee in hierdie verband nie, maar dit is onwaarskynlik dat jy jou daaroor hoef te kwel as alkohol nie vir jou of die pa ’n probleem was nie en jy jou nie te buite gegaan het in die eerste paar weke nie.
Dwelmgebruik en -misbruik kan afhanklikheid by die baba kan veroorsaak. As dit ’n eenmalige ondervinding was, het jou baba tyd in die baarmoeder om die natuur se helende en suiwerende invloed te ervaar. Ongelukkig is daar geen waarborg dat geen skade aangerig is nie. Die vroeë sonar sal gewoonlik aandui of Baba na wense ontwikkel.
Rook
Rook tydens swangerskap hou uiteenlopende nadele in. Rokers se vrugbaarheid word ook benadeel. Die bloedvate wat na die plasenta lei, is meer geneig tot afwykings, wat beteken dat die plasenta gewoonlik dunner en broser is. Dit is die baba se lewensinstandhoudingstelsel wat ’n rol