Ena Murray Oordenkings. Ena MurrayЧитать онлайн книгу.
dit dan nie wonderlik om te weet daar is Een voor wie ek nooit hoef voor te gee nie! Een wat van alles weet, sodat ek nie die moeite hoef te doen om die pynlike detail van my lewe te moet probeer verberg nie. Een wat reeds al die besonderhede ken sonder dat ek na verduidelikings en valse verskonings moet gryp. En wat my ten spyte van alles nog liefhet …
Hoe wonderlik, liefdevolle Here, dat U my hart ken en dat ek my geheime vrese en trane en hartseer en probleme sonder skroom voor u voete kan neerlê. Amen.
18 Februarie
Ek prys U, Vader, Here van hemel en aarde, dat U hierdie dinge vir slim en geleerde mense verberg het en dit aan eenvoudiges bekend gemaak het. Ja, Vader, so was dit u genadige bedoeling. – Lukas 10:21
Ons het ’n wonderlike God! Hy het die dinge van die ewigheid só eenvoudig gemaak dat kindertjies en selfs eenvoudiges van verstand en gees dit kan verstaan en dit nie hoef mis te loop nie. Daarom kan elkeen vandag met ’n hart vol dankbaarheid uitroep: “Ek prys U, Vader!”
Maar daar is ook ’n waarskuwing by. ’n Waarskuwing aan die “slim” mens – hy wat met sy hoë intellek en sy baie geleerdheid ’n verklaring en verduideliking vir alles soek, ook vir die dinge van die ewigheid. Hy wat alles bevraagteken, ook Gods Woord. Hy wat nie tevrede is om soos ’n kind en ’n eenvoudige van gees God se beloftes net gelowig te aanvaar, in volle vertroue dat wat Hy beloof het, so ís nie. Alvorens hy bereid is om te glo, wil hy as ’t ware ’n bewysstrook van God hê dat wat Hy sê, wel so is en so sál wees. Soos ’n Thomas eers die spykermerke in die verrese Jesus se hande wou sien voordat hy bereid was om te glo Jesus het opgestaan, net so wil dié mens eers klinkklare bewys hê voordat hy sal ophou om die werke en weë van God te bevraagteken.
Hoe tragies is dit dat baie van hulle aan wie God so mildelik aan verstand uitgedeel het, miskien eendag die hemelpoort sal verbyloop omdat hulle te besig was om slim redenasies te voer en nie bereid was om net te glo nie. As ons nie meer glo in wat die Woord van God vir ons sê nie, wat bly oor om in te glo? Niks. As ek my geloof in my God en my Bybel moet verloor, dan het ek alles verloor. Daar bly niks oor nie – geen sin in hierdie aardse lewe nie, en – ondenkbaar – geen God, geen hemel, geen ewige lewe nie.
O Here, vandag bevraagteken so baie “slim” mense die waarheid van u Woord, die ontstaan van die mens en die skepping van die heelal, selfs ook u bestaan. Ek bid U, Almagtige Skepper, dat U my die “eenvoudige” hart sal laat behou om te bly glo in U en u Woord. Amen.
19 Februarie
“En die tweede, wat hiermee gelyk staan, is: ‘Jy moet jou naaste liefhê soos jouself.’ ” – Matteus 22:39
Oor hierdie gebod is al baie geredeneer. “Wie is my naaste?” is ’n vraag wat al deur talle gevra is. En laat ons maar eerlik wees: In die meeste gevalle word hierdie vraag gestel met die doel om dit te omseil.
Ons besef almal die belangrikheid van hierdie gebod. God stel dit tog so uitdruklik dat daar geen twyfel hoegenaamd kan bestaan nie: Om te bewys dat jy die ewige lewe het, moet jy nie net die Here liefhê nie, maar gelykstaande daaraan, ook jou naaste. As iemand sê: “Ek het God lief,” en hy haat sy broer, is hy ’n leuenaar. Wie God liefhet, moet ook sy naaste liefhê. Hierdie twee kan nie van mekaar geskei word nie, want jou liefde vir jou naaste is die praktiese, tasbare, sigbare bewys van jou liefde vir God.
Maar nou probeer ons slim wees en óns wil besluit wie ons naaste is. Want laat ons dít ook maar erken: Daar is mense vir wie ons nie kans sien om lief te hê nie. Hulle is swart of hulle is bruin of hulle is wit. Of hulle was ontrou, of hulle het ons verkul. Hulle het ons in die rug gesteek, of hulle het ons groot leed aangedoen. Sulke mense is nie my naaste nie, besluit ons.
Moet jouself nie bluf nie. God waarsku op ’n ander plek (Matt. 6:46, 47) teen hierdie redenasie. As ons net goed doen aan dié wat aan ons goed doen, wat beteken dit nou eintlik? Die heidene doen dit ook. As ons net dié groet wat vir ons groet … As ons net lief is vir dié wat óns liefhet …
Here, ek erken: Hierdie gebod is vir my baie moeilik. In my menslikheid kan ek dit nie nakom nie. Maar deur u genade en met u Heilige Gees in my is dit vir my moontlik. U het vir my die voorbeeld aan die kruis gestel toe U nie net gebid het vir hulle wat die spykers deur U gekap het nie, maar dat U ook vir hulle gesterf het. Amen.
20 Februarie
Liewer min hê en die Here dien as groot rykdom en bekommernis daaroor. Liewer net ’n bietjie groente en liefde daarby as ’n vetgemaakte os en haat daarby. – Spreuke 15:16, 17
Dis tragies dat so baie van ons in ons strewe om bo te kom, eintlik die hele pad afklim met die leer van geluk.
Ons strewe almal daarna om te klim, om hoër te styg. Maar in die proses verloor ons dikwels soveel aan geluk en ander dinge van groter waarde dat ons eers as ons die dag bo is, die dag dat ons ryk is, besef: Maar nou is ons eintlik armer. Ons het ryker geword aan aardse goed, maar ook ryker aan kommer. Ons het daarin geslaag om ons te omring met alles wat ons gedink het die lewe die moeite werd maak, maar noudat ons dit het, moet ons vind dis nié die moeite werd nie. Want wat help al die sukses, al die rykdom, die vetgemaakte kalf op die tafel, as ek dit net met my oë kan sien en dit nie kan geniet nie? As ek, terwyl ek dit miskien wel tog gebruik en daarvan eet, dit met onrus en onvrede in die hart moet doen. Watter genot kan enigiets van hierdie aarde aan die mens gee as jy dit nie in vrede en met liefde kan geniet nie?
Pasop dus, wees waaksaam, dat jy nie dalk vandag in jou strewe na die hoogtes geestelik op die afdraande pad is nie.
Here, help my om die regte waardebepalings in die lewe te kan doen en om nie in die waan te verkeer dat ek al hoër styg terwyl ek eintlik afdraand gaan nie. Amen.
21 Februarie
Toe sê Jesus: “Iemand wat die hand aan die ploeg slaan en aanhou omkyk na wat agter is, is nie geskik vir die koninkryk van God nie.” – Lukas 9:62
Vergeet van gister. Dis verby. Jy kan niks meer daaraan toevoeg nie. Die enigste dag waarvan jy kan seker wees, is vandag, hierdie uur, hierdie oomblik.
As jy vandag jou hand aan die ploeg slaan, sal jy nie môre onseker of skuldig voel oor gister nie. Dan sal jy moed en vertroue hê vir die môres wat nog gaan kom.
Ook wat dít betref, is die mens soveel anders as sy Skepper. God kyk nie terug nie. Ook wanneer Hy vergewe, kyk Hy nie terug nie. Maar ons … ons wil altyd gister by vandag insleep. Ons vergewe, maar ons vergeet nie. Ons sal weer probeer, maar … en dan gaan haal ons al gister se ou kwellings en strydvrae en verskonings en stapel dit op in vandag.
Dis ontstellend hoeveel van ons kosbare tyd ons in gister deurbring, met dinge wat verby is. Hoeveel kere op ’n dag dink jý terug aan gister se ou dinge, kwel jy jou daaroor, werk jy jou op daaroor, ontstel jy jou daaroor, maak jy die lewe van vandag vir jouself en vir ander om jou ’n hel daaroor? Gister se kwade gevoelens, gister se gevoel van veronregting, gister se wraakgedagtes … hoeveel van gister se pligte en verpligtinge het jy ook oorgedra na vandag?
Slaan die hand aan die ploeg, kyk vorentoe. As jy aanhou omkyk, gaan jy die koninkryk van God nie bereik nie.
Help my, Vader, dat ek vandag nie een maal sal omkyk nie, maar in geloof en vertroue en met u genade sal opkyk na U en vorentoe sal gaan. Amen.
22 Februarie
(Hulle) was baie verbaas dat die Heilige Gees as gawe uitgestort is ook op mense wat nie Jode is nie. En Petrus sê: “Hierdie mense het net soos ons die Heilige Gees ontvang.” – Handelinge 10:46, 47
Snobisme is iets aakligs en pateties. Aaklig omdat dit sekerlik van die lelikste karaktertrekke is wat ’n mens kan besit; pateties omdat dit gewoonlik hulle is wat dit nie kan bekostig om hulle neuse vir ander op te trek nie, wat dit wel doen.
Snobisme in ons godsdiens is sekerlik van die jammerlikste wat met ons kan gebeur: as jy dink die hemel is net vir sekeres gereserveer; dat God se Heilige Gees eers na uiterlike dinge kyk, soos byvoorbeeld wat die kleur van