Ena Murray Oordenkings. Ena MurrayЧитать онлайн книгу.
en ons teksvers sê hulle was báie verbaas – dat die Heilige Gees ook op ander mense as Jode uitgestort is, so gaan daar menige misleide Christene báie verbaas wees wanneer hulle eendag sien met wie almal hulle die hemel sal moet deel. Maar dan, hierdie verbasing moet ons hier al van ons afweer, want geen ware Christen kan dink en glo dat God en sy genadegawe net vir sekeres opsygesit is nie.
Dit het lankal tyd geword dat ons hierdie onding van godsdienstige snobisme onder ons uitroei. Christene dwarsoor ons land, dwarsoor die aardbol het mekaar nodig in die wêreld waarin ons vandag lewe. Ons moet mekaar se hande vat, want ons is saamgesnoer deur één kruis en één Gees. En ons is almal saam op pad na één hemel.
Here, God, ek dank U dat snobisme vir U iets onbekends is. Want, as dit dalk anders moes gewees het, sou ék miskien die een gewees het by wie u Gees verbygegaan het. Dankie, Here, dat dit vir elke mens op hierdie aarde moontlik is om u Heilige Gees te ontvang. Amen.
23 Februarie
… Ek is die Here jou God wat jou onderrig tot jou beswil, wat jou lei op die pad waarop jy moet gaan. – Jesaja 48:17
So baie van ons bly kinders tot ons die dag doodgaan. Soos kinders wil ons nie graag tereggewys word nie. Ons wil nie graag onderrig word nie. Ons is mos slim genoeg om self te weet wat goed en reg is.
En hoe baie kere, ook in ons eie lewe, vang slim sy baas, kom ons daar waar ons tot ons ontnugtering moet besef: Ek was nie so slim soos wat ek gedink het ek is nie. Partykeer moet ons maar eerlik erken: Ek het al baie onnosel dinge gedoen. Dikwels moet ons bely: My slimheid het my onderin die sloot laat beland.
Die menslike slimheid is baie feilbaar en onbetroubaar. Die menslike insig kan jou op die mees onverwagte en mees kritieke moment in die steek laat. Jy kan nie werklik daarop peil trek nie. Die slimste mense doen soms die onnoselste dinge. Ek het al dinge gedoen waaroor ek myself later in verbystering moes afvra: Maar waar was my verstand dan?
Al dink jy jy is slim, al dink jy jy is briljant, al dink jy jy is ’n genie, wees maar altyd bedag op die feilbaarheid van jou eie vermoëns. Die veiligste bly maar om liewer kers op te steek by Gods Woord, daar waar jy séker is jy kry onfeilbare onderrig wat tot jou beswil sal wees. As jy werklik so slim is as wat jy dink, sal jy dit besef en dit doen: om in alles God se leiding te vra op die pad wat Hý wil hê jy moet gaan.
O Here, watter wonderlike gerusstelling is dit vir my om te weet U onderrig my en U lei my op die pad wat U wil hê ek moet gaan. Amen.
24 Februarie
“Laat vaar al julle oortredings en kry ’n nuwe gesindheid, ’n nuwe gees. Waarom wil julle sterf, Israel? Dit is nie my wil dat die mens moet sterf nie …” – Esegiël 18:31, 32
So baiekeer hoor ons iemand sê én het ons dit al self gesê: “Ag, as ek my lewe weer kon oorhê!” Dit kan nooit gebeur nie. Maar ons kan wel iets doen aan die stuk wat oor is. Dit maak nie saak hoe lank of hoe kort daardie stuk oorblywende lewe is nie. Nie een van ons kan dit in elk geval weet nie. Maar of dit nou nog jare is of ’n paar dae, of dalk net ’n oomblik, nie een van ons het ’n verskoning om nie te doen wat ons teksvers sê nie. Dis nooit te laat om ’n nuwe gesindheid, ’n nuwe gees te kry nie.
Jou gesindheid teenoor jou medemens – wie hy ook al is, of watter kleur hy ook al is – vra dit nie om verandering nie? Jou gesindheid teenoor die ewigheidsdinge? Teenoor die aardse dinge? Is dit nie tyd dat jy vir jouself bepaal watter een die belangrikste is nie? Jou gesindheid in jou werk, teenoor iemand wat jy nie kan verdra nie, teenoor jou huismense, teenoor jou werknemers, teenoor jou probleme … daar is altyd ruimte vir verandering ten goede. Sodra jy bereid is dat die Heilige Gees deur sy werk in jou jou gesindheid verander teenoor dié dinge wat krap in jou lewe, sal jy die wonderlike ervaring hê dat jyself daardeur verryk word: Jy sal ’n nuwe gees verkry. Jy sal werklik lewe, met ’n vol, ryke, gelukkige lewe.
Ag, Here, dis nie vir my met my sondige natuur maklik om my verkeerde gesindhede te verander nie. Help my daarin deur u Gees. Amen.
25 Februarie
Laat ons ons dan beywer vir die dinge wat die onderlinge vrede en opbou bevorder. – Romeine 14:19
Hoe bly ons tog in gebreke hiermee!
Hoe dikwels tree ons onnadenkend op sonder om te besef watter beroering ons optrede gaan meebring. En hoe dikwels doen ons dinge terwyl ons wéét dit kan allerhande onsmaaklike reperkussies hê.
Hoe dikwels praat ons voordat ons dink en laat sodoende seergemaakte gevoelens agter, wat weer op hulle beurt vinnig terugslaan. Só ontstaan ’n duiwelspiraal. Hoe dikwels sê ons dinge wat ons weet liewer ongesê moes gebly het. Hoe dikwels dra ons dinge oor wat ons goed weet onvrede ten gevolg gaan hê as dit rugbaar moet word …
Onderlinge vrede in ’n gesin, in ’n gemeenskap, in ’n gemeente is ’n vereiste vir groei en vooruitgang. Onvrede in ’n gesin, in ’n gemeenskap, in ’n gemeente kan net tot afbreking en aftakeling lei.
Ons weet dit almal. Hoekom kies ons dan so maklik die negatiewe? Dis seker makliker om haastig met die mond te wees as om daardie tong te knoop. Makliker om sommer te sê wat die eerste in jou opkom as om eers stil te word en na te dink. Maar die resultate is so hemelsbreed verskillend van mekaar en laat sekerlik geen vraagteken oor watter een die moeite werd is om te beoefen nie.
Vrede kan moeilik omskryf word. Dis iets wat jy eers na reg waardeer wanneer jy dit nie het nie. Maar hoekom dit eers verloor voordat jy hierdie waarheid ontdek? Niemand was nog ooit spyt oor die haastige woord wat hy nié gesê het nie!
Here, God van vrede, help my dat ek my werklik daarvoor sal beywer om vrede na te jaag waar ek ook al vandag gaan. Amen.
26 Februarie
Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing. – Galasiërs 5:22, 23
As ’n mens werklik met aandag na bogenoemde “vrugte” kyk, staan jy beskaam. Die boom word tog aan sy vrugte geken, en as ek eerlik na mý boom se vrugte kyk, moet ek bely: Ag, Here, ek kan nie eens uitmaak watter sóórt boom dit is nie!
Liefde. Hoe dikwels faal ek daarin. Hoe dikwels soek my gesin, my familie, my vriende, my gemeenskap en my naaste tevergeefs tussen die blare van vertoon daarna. Vreugde. Ag, hoe min sien die mense om my die vreugde van kind van God te wees uit my straal. Vrede. Hoe dikwels is ek die oorsaak van onvrede. Geduld. Hoe kort van draad kan ek tog wees. Vriendelikheid. Hoe baiekeer moet mense teen my suur gesig vaskyk. Goedhartigheid. Hoe dikwels vind my naaste in plaas daarvan die sieklike, verkrimpte vrug van selfsug en besitlikheid. Getrouheid. Hoe dikwels laat ek my dierbares en my God in die steek. Nederigheid. Hoe baiemaal is die eie ek en my eie belangrikheid in die plek daarvan. Selfbeheersing. Hier moet ek swyg in stomme erkenning dat my boom selde of nooit daardie vrug dra!
Hoe lyk jóú boom? Dra dit vrugte en het jy al met aandag gekyk watter sóórt vrugte dit is?
Liewe Here, ek moet bely dat U en my naaste dikwels teleurgesteld van my moet wegdraai. Help my om die vrugte van u Gees te dra. Amen.
27 Februarie
Moenie bang wees nie, dié wat by ons is, is meer as wat hulle is. – 2 Konings 6:16
Ons kan so maklik kleingelowig word. Ons staar ons so blind teen die mag van mense en vergeet so maklik van die almag van God.
Ons word so maklik beïndruk deur wat ons oë kan sien, so maklik ontmoedig deur die oormag van die Bose. En dan word ons bang soos die slaaf van Elisa toe hy die oggend opstaan en sien hulle is omring deur die vyandelike Arameërs se perde en strydwaens.
Ons wil ook dikwels maar sommer oorgee. Waarvoor verder baklei en veg as jy weet jy is met ’n verlore stryd besig? Hoekom jouself verder vermoei om goed te doen, reg te probeer lewe, vas te hou aan Gods Woord, jou kinders die regte pad te leer terwyl die oormag van die Bose tog so oorweldigend is? Wat help dit tog om jou klein wêreld mooi en reg te